विराटनगर, १६ बैशाख ।
पछिल्लो समय प्रदेश १ सभामा सिमा विवादका कुरा चर्किएर आउन थालेको छ । प्रदेश सभा बैठकमा बोल्ने उदयपुरकी सांसद अम्बिका थापाले उदयपुरमा सिमा विवाद समस्याको रुपमा रहेको सुनाईन् । बेलका नगरपालिका र बराह नगरपालिकामा सिमाना कायम गर्न विवाद रहेको थापाले बताईन ।
उनका अनुसार बेलका र सप्तकोसी नगरपालिका, उदयपुर नगरपालिका र सिरहाको सिमाना जोडिएका सबै स्थानीय तहहरुमा विवाद रहेको छ । अन्तर स्थानीय तह, अन्तर जिल्ला, र अन्तर प्रदेश बिचको सिमानाका विवाद कायम नुहँदासम्म समस्या रही रहने सांसद थापाले सदनलाई जानकारी गराईन् ।
केही दिन अगाडी मात्र उदयपुरका सांसद नारायण बहादुर मगरले उदयपुर र साबिकको त्रिबेणी र पञ्चावती गाबिसका भागहरु २ नम्बर प्रदेशको सिराहाले दाबी गर्दै आएको बताएका थिए । सडक,शिक्षा, र त्यहाँको नागरिकको मागका आधारमा योजना तथा कार्यक्रम त्यहाँ लग्नु पर्ने बताएका हुन् ।
सांसद थापाले सिमाको विषयमा देखिएको समस्यालाई तत्काल सम्बोधन नगर्ने हो भने ठुलो समस्या आउने भन्दै प्रदेश सरकारको ध्यानाकर्षण गराईन् । ‘पहिले पनि सप्तकोशी धार जता बग्यो उत्तै सिमाना कायम भएको घटना छ, सांसद थापाले भनिन, अब तत्काल प्रदेश सरकारले यसको बैज्ञानिक ब्यवस्थापन गरोस् ।’
