विराटनगर, १२ असार । विराटनगर महानगरपालिकाले पहिलो संस्करणको उप–मेयर कप अन्तर नगरपालिका महिला फुटबल प्रतियोगिताको उपाधि उचालेको छ ।
बिहिबार भएको फाइनल खेलमा बाह्रबिसे नगरपालिकालाई पेनाल्टी सुटआउटमा ४–१ गोल अन्तरले पराजित गर्दै विराटनगर च्याम्पियन बनेको हो ।
उपाधिसँगै विराटनगरले ५ लाख रुपैयाँ प्राप्त गरेको छ । उपविजेता बाह्रबिसेले ३ लाख हात पारेको छ । एपीएफको मैदानमा भएको खेलको निर्धारित समय १–१ गोलको बराबरीमा सकिएपछि खेल पेनाल्टी सुटआउटमा पुगेको थियो ।
विराटनगरकी रेखा पौडेल, ईमा राई, विद्या राना र मनमाया लिम्बूले गोल गर्न सफल भइन् । यता बाह्रबिसेका लागि रुबिना पहरीले मात्र गोल गरिन् ।
प्रतियोगिताभर उत्कृष्ट खेल प्रदर्शन गरेकी विराटनगरकी रेखा पौड्याल उत्कृष्ट खेलाडी घोषित भइन् ।
