विराटनगर । चाडपर्वमा मध्यनजर गर्दै मोरङ प्रहरीले विशेष सुरक्षा रणनीति बनाएको छ । दशैमा विराटनगरमा जनघनत्व बढी हुने र आर्थिक कारोबार पनि बढी हुने भएकोले प्रहरीले विशेष सुरक्षा योजना बनाएको जनाएको छ ।
यस पटकको दशैंमा मोरङ प्रहरीले विराटनगरमा पाँच सेक्टरमा सुरक्षा दिने रणनीति अपनाएको मोरङ प्रहरीका एसपी विश्व अधिकारीले जानकारी दिए । औद्योगिक नगरी र प्रदेशको राजधानी पनि भएकोले विराटनगरमा जनघनत्व र आर्थिक कारोबार बढी हुने प्रहरीको आँकलन छ । कुनै पनि अप्रिय घटना हुन नदिन विशेष सुरक्षा योजना बनाएको उनले बताए । आपराधिक घटना घट्न सक्ने स्थानहरुको छनौट गरी ५ सेक्टरमा बिभाजन गरी सुरक्षा योजना बनाईएको एसपी अधिकारीले जानकारी दिए ।
‘विराटनगरमा पाँच सेक्टरमा सुरक्षा योजना बनाएका छौं,’ उनले भने, ‘विराटनगर बाहिर ९ सेक्टरमा सुरक्षा रणनीति तयार भएको छ ।’ पाँच सुरक्षा रणनीतिमा सुरक्षामा गाडी मोबाईल, सादा पोशाक, सिआरबी गाडी, पिकेट, पैदल, साईकल गस्ती गर्ने तयारी छ ।
प्रहरीले दशैमा भरपर्दो सुरक्षा प्रदान गर्न ९ सय ६० जना विशेष प्रहरी परिचालन गर्ने भएको छ । 
विराटनगरमा मात्र ३ सयको संख्यामा विशेष प्रहरीले परिचालन गरिने भएको मोरङ प्रहरीले जनाएको छ । एसपी अधिकारीले जिल्ला स्थित मठमन्दिर, शक्तिपीठ तथा धार्मिकस्थलमा बिशेष सुरक्षा व्यबस्था अपनाएको बताए ।
