विराटनगर, १८ असोज । मोरङ प्रहरीले बिष्फोटक पदार्थ सहित विप्लव माओवादीका मोरङ सिक्रेटरी सहित दुईजनालाई हातहतियार सहित नियन्त्रणमा लिएर सार्वजनिक गरेको छ ।
मोरङ प्रहरीले शनिबार विराटनगरमा पत्रकार सम्मेलन गरि विप्लव माओवादीका मोरङ सेक्रेटरी कुमार खतिवडा र वालकुमार डांगी पक्राउ परेको जनाएको छ ।
उनीहरुलाई प्रदेश न १ का प्रहरी प्रमुख ठाकुरप्रसाद ज्ञवालीको उपस्थितीमा हातहतियार सहित पक्राउ गरी सार्वजनिक गरिएको थियो ।
प्रहरीले मोरङको बुढीगंगा गाँउपालिका–७ मा प्रयोग गर्न लुकाई राखेको अवस्थामा बिष्फोटक पदार्थ समेत बरामद गरेको छ ।
प्रहरीले उनकै सूचनाका आधारमा ४३ थान जिलेटिन बरामद गरेको मोरङका प्रहरी उपरीक्षक विश्व अधिकारीले जानकारी दिनुभयो । खतिवडाले बुढीगंगा गाउँपालिका–७ का बालकुमार डाँगीलाई बिष्फोटक पदार्थ लुकाएर राख्ने जिम्मेवारी दिइएका थिए । प्रहरी अनुसन्धानमा डाँगी समेत संलग्न रहेको खुलेपछि उनलाई पनि नियन्त्रणमा लिइएको हो ।
डाँगीले केराघारी भित्र माटो मुनी गाडेर निओजेल ९० लेखिएको जिलेटिन, एरियल सहितको सेतो रिमोट एकथान, तार जोडिएको बक्स एकथान, रातो टेप र तार सहितको डेटकर्ड, केप, मसिनो तार राखेको फेला परेको थियो ।
बुढीगंगा घर भएका खतिवडा सुन्दरहरैंचा–७ मा कोठा भाडामा लिएर बस्दै आएका थिए । उनको कोठाबाट आर्थिक सहयोगका लागि तयार गरिएको लेटरप्याड, विभिन्न मितिका प्रेस विज्ञप्ती, सम्पर्क नम्बर भएको डायरी, पार्टीको छाप, मेची–कोशी ब्यूरोको परिपत्र, सहयोग रसिद समेत बरामद गरिएको छ । प्रदेसभरी अहिले सम्म विप्लव समुहका ४६ जना कार्यकता पक्राउ गरिएको प्रदेश प्रहरी कार्यालयका प्रहरी प्रमुख ठाकुर प्रसाद ज्ञावलीले जानकारी दिनुभयो ।
