विराटनगर। भारतबाट पूर्वका विभिन्न शहरमा बिक्रीका लागि लग्दै गरेको प्रतिबन्धित लागुऔषध सहित प्रहरीले बिराटनगरबाट एकजनालाई पक्राउ गरेको छ । 
भारतको जोगवनीबाट बिक्रीका लागि नेपाल तर्फ लागुऔषध लिएर आउँदै गर्दा बुधबार राति विराटनगर –१५ भट्टीमोडबाट प्रहरीले एकजनालाई पक्राउ गरेको हो ।
प्रहरीको लागुऔषध नियन्त्रण ब्युरो विराटनगरको टोलीले सुनसरीको धरान उपमहानगरपालिका–४ का २२ वर्षीय रवि साहलाई पक्राउ गरेको हो । पक्राउ परेका ब्यक्तिले शरीरमा लगाएका ज्याकेट, पाईन्ट लगायतका कपडाको गोजीहरुमा प्रतिबन्धित लागुऔषध राखेर साइकलमा ओसार पसार गर्ने गरेको प्रहरीको अनुसन्धानबाट खुलेको छ । साहको साथबाट ठूलो परिणामको लागुऔषध बरामद भएको मोरङ प्रहरीका प्रवक्ता डीएसपी राजकुमार खिँउजुले बताए ।
उनका अनुसार गोजीमा राखेर ल्याउँदै गरेको अवस्थामा स्पास्मोप्रोक्सिभन दुई सय ८८ र नाइट्रोसन दुई सय ट्याब्लेट बरामद भएको छ । साह विरुद्ध बिहीबार लागुऔषध ऐन अन्तर्गतको मुद्दा चलाउन म्याद थप गरेर बाँकी अनुसन्धान सुरु गरिएको खिँउजुको भनाइ छ ।
भारतको जोगवनीबाट नेपालका विराटनगर, धरान, इटहरी लगायतका सहरमा बिक्रीका लागि लागुऔषध ल्याउने गरेको प्रारम्भिक अनुसन्धानबाट खुलेको प्रहरीले जनाएको छ ।
जोगवनीमा लागुऔषधको डिलरसम्म पुगेर साह आफैले लागुऔषध ल्याउने गरेको र दुव्र्यसनमा फसेका युवालाई खोजी गरेर बिक्री गर्ने गरेको डिएसपी खिउजुले जानकारी दिए । चाँडो पैसा कमाउने लोभमा परेर उनले केही समयदेखि नियमित कानुनद्धारा बर्जित काम गरिरहेको प्रारम्भिक अनुसन्धानबाट खुलेको मोरङ प्रहरीले जनाएको छ ।
