रौतहट। रौतहटको राजपुर बम बिस्फोट घटनामा मुख्य अभियुक्त कांग्रेस नेता एवम् पूर्वमन्त्री मोहम्मद आफताब आलम पूर्वपक्षका लागि जेल चलान भएका छन् । जिल्ला अदालत रौतहटले शुक्रबार आलमलाई पूर्व पक्षका लागि थुनामा राख्न आदेश दिएको हो ।
अदालतको इजलास नं. ४ न्यायाधीश दिपक ढकाल थुनछेक बहस पश्चात आलमलाई थुनामा राख्न आदेश दिएका हुन् । आलमको पक्ष र विपक्षमा झन्डै ९ दिनसम्म थुनछेक बहस चलेको थियो ।
अलादतमा वादी तर्फबाट १२ जना र प्रतिवादीको तर्फका २८ जना कानुन व्यवसायीले ९ दिनसम्म बहस गरेका थिए ।बहस सकिए लगत्तै इजलासमा न्यायाधीश दीपक ढकालले पीडित भनिएका श्रीनारायण सिंह र प्रतिवादी आलमलाई घटनाबारे सोधपुछ समेत गरेका थिए । पीडितले न्यायाधीशसमक्ष आ–आफ्ना कुरा राखेका थिए ।
पहिलो संविधानस्भा निर्वाचनको अघिल्लो दिन राजपुरमा भएको बिस्फोटको घटनामा सरुअठाका त्रिलोक प्रतापसिङ र ओसी अख्तरलाई जिउँदै चिम्नीमा हालेर मारेको आरोपमा आलमलाई पक्राउ गरी कर्तव्य ज्यान, ज्यान मार्ने उद्योग र बिस्फोट भडारणको मुद्दामा जन्मकैदको मागदाबीसहित जिल्ला सरकारी वकिलको कार्यालयले अदालतमा अभियोजन पत्र दर्ता गरेको थियो ।
शक्तिको आडमा बम विस्फोट घटनाबाट उम्किदै आएका आलमलाई गएको असोज २६ गते नेता प्रहरीले पक्राउ गरेको थियो ।
आलममाथि कर्तव्य ज्यान, ज्यान मार्ने उद्योग र बम विस्फोट गरी तीन वटा अभियोगमा मुद्दा दायर भएको छ । २०६४ साल चैत्र २७ गते पहिलो संविधानसभा चुनावको अघिल्लो दिन आलमका काका शेष इद्रिसको गोठमा बम विस्फोट हुँदा घाइते तथा मृत्यु भएकालाई इँटाभट्टामा हालेर जलाएको आरोप छ ।
