झापा । सामुदायिक विद्यालयका प्रधानाध्यापकसहित झापाको गौरादह नगरपालिकाबाट प्रहरीले आठ जनालाई जुवा खेलिरहेको अवस्थामा पक्राउ गरेको छ ।
गौरादाह नगरपालिका–९ स्थित दिनेश पोखरेलेको घरमा जुवा खेल्दै गरेको अवस्थामा स्थानीय अमर माध्यमिक विद्यालयका प्रधानाध्यापक गोपाल पोखरेलसहित ज्ञानेन्द्र ढकाल, जयप्रसाद गौतम, रामबहादुर ढुङगाना, महेश निरौला, रोहित बस्नेत, नेत्र पोख्रेल र गोपाल ढकाललाई प्रहरीले पक्राउ गरेको जनाएको छ ।
जिल्ला प्रहरी कार्यालय झापाका प्रवक्ता महेन्द्रकुमार श्रेष्ठका अनुसार स्थानीयले दिएको जानकारीको आधारमा उनीहरुलाई विहीबार राति इलाका प्रहरी कार्यालय झिलझिलेबाट गएको प्रहरी टोलीले पक्राउ गरेको हो ।
जुवा खालबाट प्रहरीले रु. ९१ हजार ३८० र सातवटा मोवायल बरामद गरेको छ ।
पक्राउ गरिएका आठ जनालाई इलाका प्रहरी कार्यालय दमकमा राखेर अनुसन्धान गरिरहेको र उनीहरुलाई जुवा ऐन अन्तर्गत कारवाही हुने प्रवक्ता श्रेष्ठको भनाई छ ।
