भरतपुर, चैत्र ११ । चितवनको भरतपुर महानगरपालिकामा रहेको कोरोना उपचार अस्थायी अस्पतालमा मृत्यु भएका व्यक्ति लुपस रोगका विरामी रहेको अस्पतालले जनाएको छ ।
उक्त अस्पतालमा आईसीयूमा उपचाररत रहेकै बेला उक्त युवकको मंगलबार बिहान मृत्यु भएको थियो ।
यद्यपि, उनको ‘थ्रोट स्वाब’ परीक्षणका लागि काठमाडौं पठाइएको अस्पतालले जनाएको छ । परीक्षणको नतिजा आइनसकेको अस्पतालको भनाइ छ ।
वीरगञ्जका ३० वर्षीय युवक केही समयदेखि मिर्गौला, छाला र फोक्सोमा समस्या हुने लुपुस नामक रोगबाट पीडित भएको पनि अस्पतालले प्रष्ट गरेको छ ।
ज्वरो र निमोनिया देखिएपछि चितवन मेडिकल कलेजबाट आइतबार उनलाई कोरोना अस्थायी अस्पतालमा ल्याइएको पनि अस्पतालका प्रवक्ता डा. भोजराज अधिकारीले विज्ञप्तिमार्फत जनाएका छन् ।
