एकै टोलका २२ जनासहित २३ जना स्थानीयमा कोरोना भाइरसको संक्रमण पुष्टि भएपछि बाँके जिल्लाको नेपालगञ्जमा निषेधाज्ञा जारी गरेर संक्रमितहरुको सम्पर्कमा रहेका कन्ट्याक्ट ट्रेसिंग गर्ने कार्य भइरहेको छ । यसरी कन्ट्रयाक्ट ट्रेसिङ्गमा भेटिएकका दुईसय जनाको स्वाब संकलन पनि गरिएको जिल्ला स्वास्थ्य कार्यालय बाँँकेले जनाएको छ ।
वैशाख १९ गते भेटिएका पहिलो संक्रमितको सम्पर्कमा रहेका ९४ जनाको पहिचान गरेर परीक्षण गरिएपछि २२ जनामा थप कोरोना पुष्टि भएको थियो ।
जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठका अनुसार मंगलबार अपरान्हबाटै पछि फेला परेका २२ जनाकै कन्ट्याक्ट ट्रेसिंग गर्ने कार्य शुरु गरिएकोमा अहिले पनि भैरहेको छ ।
सो क्रममा वडा नम्बर ८ को राजनको पान पसलदेखि रानी तलाउ सब्जीमण्डी, घसियारन टोल, महेन्द्र पुस्तकालय, पण्डन मोहल्लालगायतका स्थानबाट संक्रमितहरुको सम्पर्कमा आएकाको सूचि बनाउने र उनीहरुको स्वाब संकलन गर्ने दुबै कार्यसँगसँगै अगाडि बढाईएको फोकल पर्सन श्रेष्ठले बताउनुभयो ।
उहाँले यसरी कन्ट्याक्ट ट्रेसिंग गर्दा मंगलबार बेलुका ५६ जना र बुधबार १४५ जना गरेर २०१ जनाको पहिचान गरेर उनीहरुको स्वाब संकलन समेत गरिएको बताउनुभयो । अन्यको पहिचान गर्ने कार्य समेत जारी रहेको छ ।
गोरखापत्र अनलाईनबाट साभार
