काठमाडौँ
सङ्घीय संसद्को अधिवेशन आइतबारदेखि प्रारम्भ हुँदैछ । सर्वाेच्च अदालतबाट प्रतिनिधि सभा पुनर्स्थापना भएपछि दुवै सदनको अधिवेशन आह्वान भएको हो । अधिवेशनको पहिलो बैठक आइतबार अपराह्न ४ बजे बस्ने छ । बैठक सञ्चालनका लागि आवश्यक सबै तयारी पूरा भइसकेको संसद् सचिवालयले जनाएको छ ।
स्वास्थ्य मापदण्डको तय, पदाधिकारी, सांसद, र कर्मचारीको कोरोना परीक्षणसमेत भइसकेको छ । सङ्घीय संसद् सचिवालयले आइतबारको सम्भावित कार्यसूचीसमेत तय गरेको छ । यद्यपि सरकारबाट स्पष्ट निर्देशन नआउँदा कतिवटा अध्यादेश आइतबार सदनमा पेस हुने भन्ने निश्चित छैन । प्रतिनिधि सभा विघटनको अवधिमा १६ वटा अध्यादेश जारी भएका छन् । तीमध्ये बजेटसँग सम्बन्धित अध्यादेश पनि छन् ।
अध्यादेशबाहेकका विषय समेटेर सचिवालयले सम्भावित कार्यसूची तय गरेको छ । तयार पारिएको कार्यसूचीमा अधिवेशन आह्वानबारे राष्ट्रपति कार्यालयको पत्र, सरकार गठन र विस्तारबारेको पत्र र केही शोक प्रस्ताव समेटिएका छन् । कार्यसूची औपचारिक रूपमा भने आइतबार बिहान बस्ने कार्यव्यवस्था परामर्श समिति बैठकले अन्तिम टुङ्गो लगाउने छ । बिहान १० बजेका लागि समितिको बैठक बोलाइएको छ ।
प्रतिनिधि सभाका सचिव गोपालनाथ योगीले अधिवेशनको सबै तयारी पूरा भइसकेको जानकारी दिनुभयो । आइतबारको अन्तिम कार्यसूची भने कार्यव्यवस्था परामर्श समितिले टुङ्गो लगाउने उहाँले बताउनुभयो । अधिवेशन नभएको अवधिमा १६ वटा अध्यादेश जारी भएका छन् । जसमा बजेटसम्बन्धी तीन अध्यादेश, स्वास्थ्यकर्मी तथा स्वास्थ्य संस्थाको सुरक्षासम्बन्धी अध्यादेश, रेलवे अध्यादेश, नागरिकता अध्यादेश सरकारले ल्याएको थियो । सोमध्ये नागरिकता अध्यादेश सर्वोच्च अदालतले कार्यान्वयनमा रोक लगाइसकेको छ ।
कोभिड सङ्कट व्यवस्थापनसम्बन्धी अध्यादेश, शपथसम्बन्धी अध्यादेश, औषधि तेस्रो संशोधन अध्यादेश, तेजाब तथा अन्य घातक रासायनिक पदार्थ नियमन अध्यादेश, यौन हिंसा अध्यादेश तथा संवैधानिक परिषद्सम्बन्धी अध्यादेशलगायत छन् । हाल सत्तारूढ रहेको तत्कालीन विपक्षी गठबन्धनले नागरिकता, संवैधानिक परिषद्सम्बन्धी लगायतका अध्यादेशको विरोध गरेको थियो । यसअघि आफैँले विरोध जनाएका कारण ती अध्यादेश अगाडि बढाउने वा नबढाउने भन्ने निश्चित छैन ।
अध्यादेशलगायतका प्रक्रियाबारे शुक्रबार सभामुख सापकोटासँग कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले भेट गर्नुभएको थियो । संसद् सचिवालयका पदाधिकारीसँगको भेटमा आगामी कार्यसूची कसरी अघि बढाउने भन्नेबारे छलफल भएको थियो । विशेषगरी अध्यादेश सबै ल्याउने वा नल्याउने भन्नेमा छलफल भएको थियो ।
तीन जनामा कोरोना सङ्क्रमण
अधिवेशन प्रारम्भ हुनुअघि भएको कोरोना परीक्षणमा तीन जनालाई पोजेटिभ देखिएको छ । सङ्क्रमितहरू सुरक्षाकर्मी र कर्मचारी हुन् । संसद् सचिवालयले अधिवेशन प्रारम्भअघि शुक्रबार र शनिबार एन्टिजेन परीक्षण गरेको थियो । सभामुख, राष्ट्रिय सभा अध्यक्ष, दुवै सदनका सदस्यहरूको कोरोना परीक्षण भएको थियो । साथै कर्मचारी, सुरक्षाकर्मीलगायतको पनि कोभिड परीक्षण भएको थियो । कुल ८०१ जनाको परीक्षण भएको सचिवालयले जनाएको छ ।
-गोरखापत्र अनलाइन
