विराटनगर । भोजपुर प्रहरीको मातहतमा रहेको प्याउली प्रहरी चौकीको नवनिर्मित भवनको समुद्घाटन भएको छ ।
चौकी परिसरभित्रै बुधबार एक औपचारि कार्यक्रमको आयोजना गरि भवनको उद्घाटन गरिएको हो । १ नम्बर प्रदेश प्रहरी कार्यालयका प्रमुख एवं प्रहरी नायब महानिरीक्षक अरुण कुमार बि.सी.ले भवनको उद्घाटन गरेका हुन् । ८ वटा कोठासहित २ तले संरचनाको उक्त भवन प्रदेश सरकारको आन्तरिक मामिला तथा कानुन मन्त्रालयबाट विनियोजित १ करोड ४९ लाख १९ हजार ३ सय ८५ रुपैयाँको लागतमा निर्माण भएको हो ।
बुधबार आयोजित कार्यक्रममा बोल्दै प्रहरी नायब महानिरीक्षक बि.सी.ले गाँस बासको उचित व्यवस्था भएसँगै प्रहरी कर्मचारीमा काम गर्ने थप हौसला प्रवाह हुने बताए । उनले सुन्दर र सुविधासम्पन्न भवनमा बस्ने प्रहरी कर्मचारीहरुले जनमैत्री प्रहरी सेवा प्रदान गर्नेमा आफु विश्वस्त रहेको जिकिर गरे । उनले कानूनको परिधिमा रहेर जनचाहना बमोजिमको प्रहरी सेवा प्रदान गर्न प्रहरी कर्मचारीहरुलाई निर्देशन समेत दिए ।
कार्यक्रममा भने भवन निर्माणमा सहयोग पुर्याउने व्यक्तित्वहरुलाई प्रशंसा पत्रले सम्मान समेत गरिएको थियो ।
