विराटनगर । पछिल्लो समय बढ्दो सवारी दुर्घटना न्यूनीकरणका लागि लायन्स क्लब अफ विराटनगर मोरङले सचेतनामुलक स्टिकर टाँस अभियान सुरु गरेको छ ।
क्लबले जिल्ला ट्राफिक प्रहरी कार्यालय मोरङको सहकार्यमा विराटनगरको तिनपैनी चोकदेखि अभियान सुरु गरेको हो । पछिल्लो समयको अव्यवस्थित सहरीकरणसँगै बढेको सवारीसाधनको चापले दुर्घटनाको जोखिम बढेको छ ।
केही हदसम्म दुर्घटनाबाट हुने जोखिम न्यूनीकरण र ट्राफिक नियमको पालना गरि सवारीसाधन चलाउनुपर्ने सन्देश प्रवाह गर्न अभियानको सुरुवात गरिएको क्लबका विराटनगर अध्यक्ष सुदन पौडेलले बताए । उनले हाल विराटनगर केन्द्रित गरिएको यो अभियानलाई मोरङ जिल्लाभरि विस्तार गर्ने योजना रहेको जानकारी दिए ।
मङ्गलबारदेखि सुरु भएको उक्त अभियानको पहिलोदिन तिनपैनी चोकमा मोटरसाइकल, स्कुटर, सिटी सफारी र कार सहित झण्डै ३०० बढी ठुला तथा साना सवारीसाधनहरुमा स्टिकर टाँस गरिएको थियो ।
स्टिकरमा सेफ ड्राइभ सेभ लाइफ , तिब्र गति जीवनको क्षति र मादक पदार्थ सेवन गरि सवारीसाधन नचलाऔं जस्ता सन्देश लेखिएको थियो ।
उक्त अवसरमा भने लायन्स क्लब अन्तराष्ट्रियका इन्सपायरिङ लायन मिना जोशी, रिजन चेयर पर्शन राजु अधिकारी ,जोन चेयर पर्शन सतर अन्सारी र सिनियर एड्भाइजर सुर्यनारायण चौधरी लगायतको सहभागिता रहेको थियो ।
