विराटनगर । भारतदेखि तस्करी गरि भण्डारण गरेर राखिएको गोदाममा प्रहरीले छापा मारेर ठूलो परिमाणको कपडा बरामद गरेको छ । विराटनगर–९ भानुटोल कलेज रोड स्थित विनोद अग्रवालको घरको गोदमबाट छापा हानेर ठुलो परिमाणमा कपडा बरामद गरेको हो ।
१ नम्बर प्रदेश प्रहरी कार्यालय विराटनगर र जिल्ला प्रहरी कार्यालय मोरङबाट खटिएको प्रहरी टोलीले अग्रवालको घरमा भण्डारण गरि राखिएको ३५ बोरा कपडा बरामद गरेको मोरङ प्रहरीले जनाएको छ ।
भारतबाट क्यारिङ गरेर ल्याईएका विशेषगरी महिलाहरुले लगाउने लेडिज लेगिज १ हजार ९ सय ४० पिस , उलन कुर्ति ३ सय २० पिस , बनारसी साडी १ सय ३५ पिस , भेलबेट लेङ्गा ७८ पिस, रातो साडी ४२ पिस र फेन्सी कपडा १ हजार १४ पिस गरी जम्मा १९ लाख १३ हजार १ सय मुल्य बराबरको कपडा बरामद गरेको जिल्ला प्रहरी कार्यलय मोरङका प्रहरी प्रवक्ता दिपक श्रेष्ठले जानकारी दिनुभयो ।
कपडा कसको हो भन्ने अहिले सम्म पत्ता नलागेको प्रवक्ता श्रेष्ठले बताउनुभयो । बरामद सबै लत्ताकपडा आवश्यक कारवाहीको लागि मूल भन्सार कार्यालय रानी, विराटनगरमा बुझाई थप अनुसन्धान कार्यका लागी पठाएको मोरङ प्रहरीले जनाएको छ । 
