विराटनगर । ताप्लेजुङको फुङ्लिङ नगरपालिकामा ट्रयाक्टर दुर्घटना हुँदा चारजना घाइते भएका छन् । प्रहरीकाअनुसार फुङ्लिङ नगरपालिका–६ को बतासेमा ना ६ त ४७४३ नम्बरको ट्रयाक्टर चारजना घाइते भएका हुन् ।
सुकेटारदेखि सदरमुकाम फुङ्लिङ बजारतर्फ जाँदै गरेको ट्रयाक्टर मंगलबार साँझ सडकदेखि करिब २० मिटर तल झरेर दुर्घटना भएको थियो । उक्त दुर्घटनामा परी ट्रयाक्टरमा सवार फुङ्लिङ नगरपालिका–११ फावाखोला बस्ने १८ वर्षीय प्रकाश बुढाथोकी, सोही वडाका २२ वर्षीय बिक्रम लिम्बू घाइते भएका जिल्ला प्रहरी कार्यालय ताप्लेजुङले जनाएको छ ।
त्यसैगरी सिरिजङ्घा गाउँपालिका–३ सिकैँचाका ६१ वर्षीय पूर्णहाङ लिम्बू र सिकैँचाकै २१ वर्षीय सिपन लिम्बू घाइते भएका छन् । दुर्घटनाका घाइते चारैजनाको अवस्था गम्भीर भएकाले उनीहरुलाई सुविधा सम्पन्न अस्पतालमा उपचार गर्नका लागि जिल्ला बाहिर रेफर गरिएको जिल्ला प्रहरी कार्यालय ताप्लेजुङका सूचना समन्वय अधिकृत प्रहरी निरीक्षक कुशराम कार्कीले जानकारी दिए ।
ट्रयाक्टरका चालक फुङ्लिङ नगरपालिका–११ फावाखोला बस्ने २३ वर्षीय रत्नबहादुर लिम्बूलाई प्रहरीले नियन्त्रणमा लिई दुर्घटनाका बारेमा थप अनुसन्धान भई रहेको प्रहरी निरीक्षक कार्कीले बताए ।
