विराटनगर । विराटनगर–१२ की कमला घिमिरे चिया–नास्ता पसल गर्थिन् । उनका श्रीमान् न्यूरो–कार्डियो अस्पतालको गाडीका चलाउँथे । एक छोरी र एक छोरासहित चारजनाको उनीहरुको परिवार जेनतेन चलिरहेको थियो । परिश्रमले बाँचेका परिवार खुशी र सुखी थिए ।
गत माघमा एकाएक कमलाका श्रीमान भीमबहादुर घिमिरेलाई ढाड दुख्यो । उनले गाडी चलाउन नसक्ने भए । न्यूरोमा काम गर्ने उनको स्वास्थ्य परीक्षण गरियो । रिपोर्टमा उनलाई देखियो हड्डीको क्यान्सर !
त्यसपछि कमला आफ्ना श्रीमान्को उपचारमा लागिन् । जेनतेन जीविका चलाउने पसल पनि बन्द भयो । छोरी स्नातक पढ्दै छिन्, छोरो कक्षा ९ मा अध्ययनरत ।
उनीहरुका लागि क्यान्सरको उपचार सहज थिएन । आफू र आफन्तसँगको भरमा १२ लाख खर्च भईसकेको छ । क्यान्सर पीडित भीमबहादुरको स्वास्थ्य अवस्था झन् कमजोर बन्दै गयो । उपचार गर्ने पैसा पनि सकियो ।
शुक्रबार पत्रकार महासंघमा उपचारका लागि कमलाले सहयोगको याचना गरेकी छिन् । उनले आफूसँग भएको पैसा सकिएकोले आफ्ना श्रीमानको किमोथेरापी गर्ने अवस्थाबाट पनि बन्चित हुनु परेको दुखेसो पोखिन् ।
केहि सहयोग जुटे श्रीमानको उपचारमा लगाउने उनको ईच्छा थियो । हड्डीको क्यान्सरले थलिएका भीमबहादुर फोक्सोमा पानी जमेर थप समस्यामा परेको कमलाको भनाई छ । ४१ वर्षीय भीमबहादुर मज्जाले अडिन नसक्ने भईसकेका छन् । सहयोगका लागि अपिल गर्न राखिएको पत्रकार सम्मेलनमा पनि उनी बोल्न सकेनन् ।
अवस्था गम्भीर भएपछि उपचारका लागि सहयोगको याचना मागेका उनीहरुले सम्पर्कका लागि ९८४२०६८३८६ नम्बर दिएका छन् ।
पत्रकार महासंघ अगाडीको कलेज रोडमा रहेको घिमिरे चिया पसल पनि अहिले छोड्नु परेको छ । त्यहाँ चिया–नास्ता बिक्री गरेर उनीहरुले दैनिक जीविका चलाईरहेका थिए । अहिले जीविका चलाउन पनि समस्या परेको गुनासो गर्दछन् ।
