काठमाडौं । इङ्ग्ल्यान्ड र पाकिस्तानबीचको चौथो टी–२० क्रिकेट आजबाट सुरु हुने भएको छ ।
खेल कराचीमा बेलुका सवा ८ बजे सुरु हुनेछ । यी दुई देशले ७ खेलको टी–२० शृङ्खला खेलिरहेका छन् । यसअघि भएका तीन खेलमा इङ्ग्ल्यान्डले दुई र पाकिस्तानले एउटा खेलमा विजयी भइसकेको छ ।
शृङ्खलामा इङ्ग्ल्यान्ड २–१ ले अगाडि छ । आजको खेल जितेमा घरेलु टोली पाकिस्तानले शृङ्खलामा २–२ को बराबरी गर्नेछ । पहिलो खेलमा पाहुना टोली इङ्ग्ल्यान्ड ६ विकेटले विजयी भएको थियो । त्यस्तै दोस्रो टी–२० मा घरेलु टोली पाकिस्तानले १० विकेटको कीर्तिमानी जित निकालेको थियो भने तेस्रो टी–२० क्रिकेटमा पाकिस्तान ६३ रनले पराजित भएको थियो ।
दुई देशबीचको पाँचौँ खेल बुधवार, छैटाैँ खेल शुक्रवार र सातौँ तथा अन्तिम टी–२० खेल आउँदो आइतवार हुनेछ ।
