मसंग तिम्रा लागि के के छन्
भन अब
मेरा लागि तिमीसंग के के छन् ?
म भनूँ तिमीलाई ?
कि, म संग तिम्रा लागि के के छन् ।
तिमीले प्रतीक्षा गरेका चौक,
हात समाएर मध्यरातमा हिडेँका निर्जन सडकहरु
जहाँ तिम्रा प्रतिच्छाँयाहरु छन् ।
वर्षौ पहिले सँगै रुझेको झरी छ मसँगै ।
असारले काटेको नदि किनार
र हाइकिङ गरेका महाभारत लेकका सुन्दर चुचुराहरु छन ।
संसारलाई हजार पटक फन्को लाउन पुग्ने
यादहरुको रिवन छ ।
तिम्रा लागि सात समुद्र अटाउन सक्ने भएर
शून्य शून्य बनेको यो हृदय छ ।
हामीले साटेका किताबहरु ।
उपहारहरु ।
म्यासेजका स्क्रिन सट र संगै खिचेका तस्वीरहरु छन् ।
वर्षौदेखी डायल नभएको एउटा नम्बर
सेन्ड नभएका केही म्यासेज
र तिम्रो जन्मदिनमा लेखेर पठाउन नसकेको
एउटा मार्मिक पत्र छ ।
युटुवमा तिम्रा दृश्यहरु छन्
तिमीले बेचिसकेको स्कुटरको नम्बर
र तिम्रो जन्म मिति मलाई याद छ
अझै भनुँ
तिम्रा लागि म संग के के छन……….
तर अपशोस
मेरा लागि तिमी छैनौ
र तिम्रो लागि म छैन ।
