विराटनगर । कोशी प्रदेशको मुख्यमन्त्री नेपाली कांग्रेसलाई दिने सत्ता गठबन्धनले निर्णय गरेको छ ।
बालुवाटारमा आज बसेको बैठकले कांग्रेस कोशी प्रदेश संसदीय दलको नेता उद्धव थापालाई मुख्यमन्त्री बनाउने निर्णय गरेको हो ।
गठबन्धनभित्र कांग्रेसको सबैभन्दा ठूलो संख्या रहेकोले कांग्रेसलाई मुख्यमन्त्री दिने निर्णय भएको बैठकमा सहभागी नेकपा एकीकृत समाजवादीका कार्यबहाक अध्यक्ष राजेन्द्र पाण्डेले जानकारी दिए ।
सबैभन्दा ठूलो दल काँग्रेस रहेकोले उसको नेतृत्वमा सरकार गठन गर्न प्रदेशलाई सुझाब दिने निर्णय भएको उनको भनाई छ । सरकार गठनको लागि बहुमत जुटाउने जिम्मा पनि काँग्रेसलाई दिएको उनको भनाइ छ ।
गत पुस २४ गते मुख्यमन्त्री बनेका नेकपा एमालेका संसदीय दलका नेता हिक्मतकुमार कार्कीले प्रदेशसभाबाट विश्वासको मत नपाएपछि नयाँ सरकार गठनको प्रक्रिया अगाडि बढेको छ । ९३ सदस्यीय प्रदेशसभामा बहुमतको लागि ४७ सिट चाहिन्छ ।
नेपाली कांग्रेसको २९, माओवादीको सभामुखसहित १३, नेकपा एसको ४ र जसपाको १ गरी गठबन्धनसँग ४७ सीट रहेपनि एमालेले सभामुखको गणना गर्न नमिल्ने बताउँदै आएको छ ।
राप्रपाले एमालेको साथ नछाडे कोशी प्रदेशसभामा विपक्षी गठबन्धनको बहुमत पुग्ने अवस्था छैन ।
नेकपा एमाले संसदीय दलका नेता हिक्मत कार्कीले असार १५ गते (शुक्रबार) प्रदेशसभा बैठकमा विश्वासको मत नपाएपछि नयाँ सरकार गठनका लागि आह्वान गरिएको हो ।
