काठमाडौँ । सातौँ दक्षिण एसियाली आइटीएफ तेक्वान्दो च्याम्पियनसिपमा सहभागी हुन १४ खेलाडीसहित २५ सदस्यीय नेपाली टोली आज भारतको हैदराबाद प्रस्थान गरेको छ ।
खेलाडीमा लीलाकुमारी सापकोटा, सुनिल महतो, सञ्चिता श्रेष्ठ, तेन्जिङ दावा तामाङ, सविना तामाङ, मुना राई, रोनिका पराजुली, अनिल खड्का, रोशन घिसिङ, विनिता थापा मगर, निर्मल लामा, साहिल दोङ, डोल्मा गुरुङ र रिक्साङ वाइबा तामाङ लगायत रहेका छन् ।
प्रशिक्षकमा ईश्वर थापामगर, धनराज तामाङ, सपुत मोक्तान र मोतीलाल घिसिङ छन् । प्रतियोगितामा अञ्जन धमला, अन्जु रावत, पुकार केसी, रुपसिंह तामाङ, राजेश बोलाखे, तुलसी थापामगर र दिलमाया गुरुङले अम्पायरको भूमिका निर्वाह गर्ने छन् ।
नेपालबाट ५१ जना महिला तथा पुरुष खेलाडी,२० जना अम्पायर र अफिसियलले प्रतियोगितामा सहभागिता जनाउने छन् ।
टोलीलाई राष्ट्रिय खेलकुद परिषद्का उपाध्यक्ष शिव कोइराला र नेपाल आईटीएफ तेक्वान्दो महासङ्घका सदस्य गोपाल श्रेष्ठले आजै यहाँ आयोजित एक कार्यक्रमबीच बिदाई गर्नुभयो ।
प्रतियोगिता आगामी अगष्ट ४ देखि ६ तारिखसम्म हुनेछ । उक्त प्रतियोगितामा नेपाल,भारत,बंगलादेश,भुटान,श्रीलंका,माल्दिप्सका खेलाडीहरुले सहभागीता जनाउने नेपाल इन्टरनेशनल तेक्वान्दो महासंघका अध्यक्ष प्रवीण कुमार कार्कीले जानकारी दिए । रासस
