विराटनगर । कोशी प्रदेशकी उपसभामुख सिर्जना दनुवार बैठकमा अनुपस्थित हुने भएपछि प्रदेशसभा सचिवालयले कानुन व्यवसायीसँग परामर्श थालेको छ ।
कोशी प्रदेश प्रमुखकी उपसभामुख दनुवार आफैँले आज (सोमबार) प्रदेशसभाको बैठक बोलाएकी थिइन् । तर, उनी आफू बिरामी भएको कारण देखाउदै काठमाडौं हिडेंपछिको परिस्थितिबारे प्रदेशसभा सचिवालयले कानुन व्यवसायीसँग परामर्श थालेको हो । उपसभामुख दनुवारको अनुपस्थितीमा प्रदेशसभाको बैठक कसरी संचालन गर्ने भन्नेबारे सचिवालयले मुख्यन्यायाधिवक्ता सहित कानुन व्यवसायीसँग छलफल गरेको हो ।
छलफलको लागि सचिवालयले कोशी प्रदेशका मुख्यन्यायाधिवक्ता बुद्धिबहादुर कटुवाल, पूर्व मुख्यन्यायाधिवक्ता चुणामणि आचार्यसहित कानुन व्यवसायीसँग छलफल गरेको हो ।
उपसभामुख दनुवार अनुपस्थित भएपछि बिहान ८ बजेको लागि राखिएको कार्यव्यवस्था समितिको बैठक स्थगित भएको थियो । बैठकमा सहभागी सदस्यहरुको सल्लाहअनुसार कानुन व्यवसायीसँग छलफल भइरहेको कोशी प्रदेशसभा सचिव गोपाल प्रसाद पराजुलीले जानकारी दिए । उपसभामख दनुवारले आफू अनुपस्थित हुँदा अध्यक्ष मण्डलका सदस्य इसराईल मन्सुरीलाई बैठक संचालनको कार्य जिम्मेवारी दिएको बारे संवैधानिक र कानुनी छलफलमा सचिवालय जुटेको हो ।
मुख्यमन्त्री उद्धव थापाले विश्वासको मत लिने कार्यसूची रहेकै दिन उपसभामुखको अनुपस्थिति तथा उनले बैठक संचालनको जिम्मेवारी मन्सुरीलाई तोकेको विषयको कानुनी र संवैधानिक हैसियतबारे छलफल भईरहेको बताइएको छ।
