विराटनगर । काठमाडौं विश्वविद्यालय स्कुल अफ एजुकेशन र एस्पायर कलेज विराटनगर बीच शैक्षिक तालिम संचालन गर्ने सम्झौता भएको छ।
काठमाडौं विश्वविद्यालय र एस्पायर कलेज बीच निरन्तर व्यावसायिक शैक्षिक केन्द्र(सी. पी. ई. सि) मार्फत शिक्षक र शिक्षकहरूको विकासशील आवश्यकताहरूलाई सम्बोधन गर्ने उदेश्यले सम्झौता गरिएको कलेजले जनाएको छ।
सी. पी. ई. सि केन्द्र अन्तर्गत विभिन्न निरन्तर व्यावसायिक शैक्षिक कार्यक्रमहरू(सि.पी.ई.पी) कोशी प्रदेशमा विस्तार गर्ने वातावरण तयार भएको कलेज प्रशासनले जनाएको छ ।
काठमाडौं विश्वविद्यालय स्कुल अफ एजुकेशनबाट संचालन भएको सी. पी. ई. सि ले बिगत लामो समयदेखि देशका विभिन्न क्षेत्रहरुमा रहेका समुदायमा आधारित संस्थाहरू र स्थानीय अधिकारीहरूसँग सहकार्य गरेर शिक्षाको विभिन्न तहमा परिवर्तन ल्याउन सक्ने शिक्षक र शैक्षिक प्रतिनिधिहरुलाई तालिमको माध्यमबाट मद्दत गर्ने काम गरिरहेको छ।
उक्त संस्था बिचको सहकार्यले अत्याधुनिक शिक्षक पेशागत विकासका कार्यक्रमहरू उपलब्ध गराउनेछ जुन कोशी प्रदेशका विभिन्न तहमा कार्यरत शिक्षकहरुको शैक्षिक स्तर बढाउने र सशक्तिकरण गर्ने दिशामा महत्वपूर्ण कदम हुने कलेज जनाएको छ ।
त्यस्तैगरी, यस सहकार्यले शिक्षकहरूको व्यावसायिक वृद्धि र विकासलाई पूरा गर्ने आवश्यकतामा आधारित तालिम कार्यक्रमहरू विकास गर्न दुवै संस्थाहरूको विशेषज्ञता र स्रोतहरू एकसाथ ल्याउनेछ।
यसै सन्दर्भमा काठमाडौं विश्वविद्यालय स्कुल अफ एजुकेशनका डीन प्रा. डा. बालचन्द्र लुइटेलले यो साझेदारीप्रति उत्साह व्यक्त गर्दै भन्नू भयो “हामीले हाम्रा विशेषज्ञता र स्रोतहरू जोडेर शिक्षकहरूको लागि अझ प्रभावकारी र दिगो व्यावसायिक विकास इकोसिस्टम निर्माण गर्न सक्छौँ । साथै यो सहकार्यले कोशी प्रदेशका शिक्षकहरूलाई उनीहरूको सीप वृद्धि गर्न र द्रुत रूपमा विकसित हुँदै गइरहेको शिक्षा परिदृश्यसँग जानकार रहन विभिन्न अवसरहरू प्रदान गर्नेछ।"
त्यसैगरी, एस्पायर कलेजका अध्यक्ष विकास अधिकारीले यस सहकार्यप्रति सकारात्मक धारणा ब्यक्त गर्दै "हाम्रो साझा भिजन भनेको शिक्षकहरूलाई आकर्षक र प्रभावकारी सिकाइ वातावरण सिर्जना गर्न आवश्यक ज्ञान र सीपहरूद्वारा सशक्त बनाउनु हो। यसका लागि हामीले हाम्रा स्रोतहरू र विशेषज्ञताहरु मिलाएर अर्थपूर्ण बनाउन सक्छौं र शिक्षकहरूको व्यावसायिक वृद्धिमा अर्थपूर्ण भिन्नता ल्याउन सक्छौं जसले गर्दा विद्यार्थीहरू र सम्पूर्ण शिक्षा प्रणालीलाई फाइदा पुर्याउने बिचार व्यक्त गर्नुभयो ।
सी.पी.ई.सि इकाई, विराटनगरले शिक्षकको व्यावसायिक विकास तालिम र कार्यशालाहरूको आवश्यकताको विश्लेषण, टि.पि.डी सत्रहरूको आयोजना र सञ्चालन, सिकाइ स्रोतहरूको योजना र विकास, निरन्तर अनुगमन र प्रतिक्रिया, प्रभावकारीताका लागि अनुगमन र मूल्याङ्कन जस्ता विभिन्न सेवाहरू प्रदान गर्न कोशी प्रदेश वरपरका शैक्षिक संस्थाहरूलाई लक्षित गरेर आफ्ना कार्यलाई अघि बढाउने कलेजले जनाएको छ ।
उक्त इकाईले संकाय र विद्यालय शिक्षकहरूको लागि क्रेडिट आवर सहितको विभिन्न छोटो पाठ्यक्रमहरुका कार्यक्रम पनि सञ्चालन गर्ने गरिएको छ ।
