-निर्मला देवी तिम्सिना (कान्छी)
कति अनौठो मेरो जिन्दगीको कहानी छ
बाहिर सग्लो शरीर भित्रभित्रै खरानी छ ।
अघिल्तिर ठिक्क पार्छन् आफ्ना भन्नेहरु
पछाडिबाट सिध्याउने उनीहरूको बानी छ ।
मुखमा राम राम छ बगलीमा छुरा बोक्ने
हरेक जनजनमा शिकारीको निशानी छ ।
धनसम्पतीकै कारण आज अपहेलित भएँ
हुने खाने सम्पतिवाल आखाँको नानी छ ।
जमाना पनि कस्तो आयो पापी स्वार्थी बढे
जहाँजहाँ भ्रष्टाचारी त्यहाँत्यहाँ लगानी छ ।
