काठमाडौँ । नेपाली कांग्रेसले राष्ट्रिय मेलमिलाप दिवस मनाउने परम्परागत शैली तोड्दै विपक्षी दलहरूलाई समेत निम्तो दिएको छ ।
शनिबार सम्पन्न केन्द्रीय कार्यसमिति बैठकले यसवर्षको मेलमिलाप दिवस विशेष कार्यक्रम गरेर मनाउने र परम्परागत शैलीभन्दा भिन्न कार्यक्रमहरू आयोजना गर्ने निणर्य गरेको हो ।
कांग्रेसले १६ पुस अर्थात् भोलि (सोमबार) राष्ट्रिय मेलमिलाप मनाउने निणर्य गरेको हो । प्रचार विभाग प्रमुख मीन विश्वकर्माले यो वर्ष कांग्रेसले प्रदर्शनीमार्गस्थित राष्ट्रिय सभागृहमा विशेष कार्यक्रम गरेर दिवस मनाउने निणर्य गरेको बताए । ‘विगतमा हामीले आन्तरिक रुपमा मात्रै यो दिवसलाई मनाउने गरेका थियौँ । तर मेलमिलाप दिवसले नेपालको राजनीतिमै महत्वपूर्ण अर्थ राखेको पृष्ठभूमिलाई ख्याल गर्दै यो वर्ष सत्ता गठबन्धन र विपक्षी दलहरूलाई समेत बोलाएर अन्तरक्रिया गर्ने निणर्य भएको छ,’ उनले भने । कार्यक्रमका लागि दलहरूलाई निम्तो दिने कामसमेत भइसकेको उनले बताए ।
कांग्रेसका संस्थापक नेता एवम् प्रथम जननिर्वाचित प्रधानमन्त्री बीपी कोइराला आफूमाथि आठ-आठ वटा मृत्युदण्डका मुद्दा अदालतमा चलिरहेका बेला पनि राष्ट्रिय एकताका लागि जीवन अर्पण गर्न तयार भएको भन्दै २०३३ साल पुस १६ गते स्वदेश फिर्ता भएका थिए । त्यही दिनको सम्झनामा कांग्रेसले मेलमिलाप दिवस मनाउने गरेको छ ।
त्यसबेला कोइरालासँगै सर्वोच्च नेता गणेशमान सिंह, नेत्री शैलजा आचार्य, नेता खुमबहादुर खड्का, रामबाबु प्रसाई, नीलाम्बर पन्थीलगायत नेता कार्यकर्ता राष्ट्रिय एकता तथा मेलमिलापको नीति लिई करिब आठ वर्ष लामो निर्वासित जीवन त्याग गरी स्वदेश फर्किएका थिए ।
नेपाल फर्किएका कोइरालासहित नेताहरूलाई विमानबाट त्रिभुवन विमानस्थलमा ओर्लिनेबित्तिकै बन्दी बनाएर सुन्दरीजल पुर्याइएको थियो । कांग्रेसले त्यसयता पुस १६ लाई मेलमिलाप दिवसको रुपमा मनाउने गरेको छ । न्यूज एजेन्सी नेपाल
