काठमाडौं । सरकारले बालकुमारी घटनाको छानबिन गर्न उच्चस्तरीय समिति गठन गर्ने भएको छ । बालुवाटारमा आइतबार बसेको सत्ता गठबन्धनको बैठकमा उच्चस्तरीय छानबिन समिति गठन गर्ने सहमति भएको हो ।
यसका लागि प्रधानमन्त्री पुष्पकमल दाहालले उपप्रधान तथा गृहमन्त्री नारायणकाजी श्रेष्ठलाई निर्देशन दिएका छन् । सोमबार हुने मन्त्रिपरिषद् बैठकले गठन गर्ने समितिले छानबिन तत्काल सुरु गर्ने बैठकका सहभागी कांग्रेस संसदीय दलका प्रमुख सचेतक रमेश लेखकले बताए ।
उनले भने ‘बालकुमारी गोल काण्डबारे छानबिन गर्न उच्चस्तरीय छानबिन आयोग गठन गर्न प्रधानमन्त्रीजीले गृह मन्त्रालयलाई निर्देशन दिनुभयो । गृह मन्त्रालयले भोलि मन्त्रिपरिषद् बैठकमा प्रस्ताव ल्याएर निणर्य गरी आयोगले काम गर्ने व्यवस्था मिलाउने कुरा भएको छ ।’
कोरियाली भाषा परीक्षामा सहभागिताका लागि भएको प्रदर्शनमा प्रहरीको बल प्रयोग र गोलीबाट बालकुमारीमा शुक्रबार अछामका वीरेन्द्र शाह र दैलेखका सुजन रावतको मृत्यु भएको थियो । घटनामा भौतिक पूर्वाधार तथा यातायात मन्त्री प्रकाश ज्वाला चढ्ने सरकारी गाडीमाथि आगजनी भएको थियो । घटनाका पीडित परिवारले अझै शव बुझेका छैनन् ।
न्यायिक छानबिनसँगै दोषीमाथि कारबाहीका माग गर्दै प्रदर्शन भइरहेको छ ।
