इलाम । इलामको सन्दकपुर गाउँपालिका–५ जौबारीमा पोथी रेडपाण्डा मृत अवस्थामा फेला परेको छ । गैरीबास रोड नजिक वृक्षारोपण गरिएको क्षेत्रमा तारबार गर्ने क्रममा पोथी रेडपाण्डा मृत फेला परेको हो ।
सन्दकपुर गाउँपालिका पशु सेवा शाखा, सन्दकपुर सब डिभिजन देउराली, चोयाटार सामुदायिक वन उपभोक्ता समिति, प्रहरी चौकी तथा स्थानीयको रोहबरमा मृत रेड पाण्डालाई परीक्षणका लागि भेटेरिनरी अस्पताल तथा पशु सेवा केन्द्र इलाम पठाइएको छ ।
जौबारी भारत नजिक पर्दछ । खुला सिमानाका कारण रेडपाण्डाको तस्करी हुँदै आएको स्थानीय बताउँछन् । सन्दकपुर गाउँपालिकाको जौबारी, जमुना, चोयाटारलगायत ठाउँमा रेडपाण्डा पाइन्छन् । रेडपाण्डा संरक्षणमा केही संस्था क्रियाशील रहे पनि लक्ष्यित उद्देश्य हासिल नभएको उनीहरूको गुनासो छ । केही समयअघि पनि यहाँ मृत अवस्थामा रेडपाण्डा फेला परेको थियो ।
