काठमाडौं । धितोपत्र बोर्डभित्रको अनियमितता र बेथिति अन्त्यको माग गर्दै नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका कार्यकर्ताहरूले सोमबार काठमाडौंमा प्रदर्शन गरेका छन् ।
बोर्डमा विभिन्न नीतिगत भ्रष्टाचार भएको आरोप लगाउँदै नेकपाको उपत्यका ब्युरोले त्यसको सुधारका लागि दबाबस्वरूप प्रदर्शन गरेको बताएको छ ।
काठमाडौंमा धितोपत्रबोर्ड कार्यालय अगाडि विप्लवका कार्यकर्ताले विभिन्न नारा लेखेको प्लेकार्डसहित नाराबाजी गरेका थिए । प्रदर्शनमा उनीहरूले ‘सार्वजनिक पदको नियुक्ति पारदर्शी गर’,‘पुँजीबजार शुद्धीकरण गर’,’धितोपत्र बोर्ड अध्यक्षको नियुक्ति पारदर्शी गर’,‘वित्तीय एकाधिकार अन्त्य गरौं’ लगायतका नारा लगाएका थिए । नेकपाका कार्यकर्ता अमित शर्माले २० बुँदामा धितोपत्र बोर्डले नीतिगत भ्रष्टाचार गरेको आरोप लगाउँदै पत्र पढेका थिए ।
उक्त पत्रमा बोर्डले कुनै समूहलाई फाईदा पुग्नेगरी नीति अबलम्बन गरेको, एउटै व्यक्तिले नियमन निकायको प्रमुख बनेर काम गरेको तथा बजार नियमन गर्ने निजी कम्पनी सञ्चालन गर्ने गरेको उल्लेख छ ।
त्यस्तै धितोपत्र सार्वजनिक निष्कासन तथा विक्री अनुमति विधि र प्रकृया निर्धारण गर्ने कार्यमा ठूलो चलखेल गरेको, लगानीकर्ताको हित सुरक्षण गर्न नसकेकोलगायतका विविध २० बुँदामा असन्तुष्टि जनाएका छन् ।
