विराटनगर । नेपाली कांग्रेसका पूर्वमहामन्त्री कृष्णप्रसाद सिटौलाले राष्ट्रका चुनौती सामना गर्न सबै दलबीच समझदारी आवश्यक रहेको बताएका छन् ।
राष्ट्रियसभा निर्वाचनको लागि कोशी प्रदेशबाट उम्मेदवारी दर्तापछि आज सञ्चारकर्मीसँग कुरा गर्दै सिटौलाले राष्ट्रका चुनौती सामना गर्न सबै दलबीच समझदारी आवश्यक रहेकोमा जोड दिँदै आफू त्यसमा लागिपर्ने बताए । नेपालको राजनीतिक विकासक्रममा संसदबाट नयाँ ढंगले अगाडी जान आवश्यक रहेको बताउँदै उनले दलहरुबीचमा संसदमा नयाँ समझदारी निर्माण हुनुपर्ने उल्लेख गरे ।
काँग्रेसका उम्मेदवारहरुलाई र गठबन्धनका उम्मेदवारहरुलाई जिताउन काँग्रेसले एकताबद्ध भएर अगाडी बढ्ने सिटौलाको भनाई थियो । राष्ट्र सामु उपस्थित चुनौतीको सामना गर्ने र जनताको हितमा साझा दृष्टिकोण लिएर काम गर्ने बताउदै उनले पार्टीले त्यही भूमिका निर्वाह गर्न आफूलाई उम्मेदवार बनाएको दावी गरे । आफू पार्टीबाट सर्वसम्मत रूपमा उम्मेदवार भएको भन्दै उनले राष्ट्रियको अध्यक्ष बन्ने गरि उम्मेदवार बन्नुभएको हो भन्ने सञ्चारकर्मीको प्रश्नमा भने अहिले त्यसबारे चर्चा गर्नु उचित नभएको प्रतिक्रिया दिए । निर्वाचन परिणाम आएर राष्ट्रिय सभामा पुगेपछि ती प्रश्नको स्वभाविक रूपमा जवाफ आउँने उनको भनाइ थियो ।
उम्मेदवार चयनका विषयमा महामन्त्रीद्वय गगन थापा र विश्व प्रकाश शर्माले फरक मत राखेको बारे सोधिएको प्रश्नमा सिटौलाले आफ्नो उम्मेदवारी बारे पार्टीमा विवाद नभएको दावी गरे । आफू सबैसँग बिदा मागेर आइतबार साँझ नै विराटनगर हिँडेको र सबै कुरा बुझ्न नपाएको उनको भनाइ छ ।
