काठमाडौं । फ्रेन्च लिग वान फुटबलमा पेरिस सेन्ट जर्मेन पीएसजीले अपराजित यात्रा कायमै राखेको छ ।
शुक्रबार राति भएको खेलमा रेनेसमाथि ३–१ गोल अन्तरको जीत दर्ता गरेको हो ।
घरेलु मैदानमा पीएसजीलाई जिताउनका लागि ब्राड्ले बारकोलाले २ गोल गर्दा ली काङ इनले १ गोल गरे । ३० औं मिनेटमा बारकोलाले ओस्मान डेम्बेलेको पासमा गोल गर्दै अग्रता दिलाएका थिए । पहिलो हाफमा १ गोल गरेको पीएसजीले दोस्रो हाफमा २ गोल थप्दा १ गोल बेहोरेको थियो ।
५८ औं मिनेटमा ली काङले गोल गर्दै पीएसजीको अग्रता दोब्बर बनाए । ६८ औं मिनेटमा असरफ हकिमीको पासमा बारकोलो व्यक्तिगत दोस्रो तथा टिमका लागि तेस्रो गोल गरेका थिए ।
७५ औं मिनेटमा रेनेसका आर्नोड कलीमुयन्डोले पेनाल्टीमा गोल गरेर अन्तर कम गरे पनि हार टार्न पर्याप्त भएन । जीत पछि पीएसजीले ६ खेलबाट १६ अंक बनाउँदै आफूलाई शीर्ष स्थानमा यथावत राखेको छ भने रेनेस ६ खेलमा ७ अंक बनाउँदै तालिकाको आठौं स्थानमा छ ।
