विराटनगर। सांसद रुबिना आचार्यले मोरङ निर्वाचन क्षेत्र नम्बर ६ अन्तर्गत पर्ने जोखिमयुक्त क्षेत्रहरूको स्थलगत अनुगमन गरेकी छन्।
सुन्दरहरैचा नगरपालिका–०५ का गौशाला नयाँ वृन्दावन, जनसेवा पछाडिको कटान क्षेत्र र गोर्खाली टोलमा पुगेर उनले बुढीखोला र गछिया खोलाबाट उत्पन्न सम्भावित जोखिमको अवस्था अध्ययन गरिन्। स्थानीयवासीसँग प्रत्यक्ष छलफल गर्दै उनले कटान नियन्त्रण, नदी व्यवस्थापन र तत्काल आवश्यक हस्तक्षेपका विषयमा जानकारी लिएकी थिइन्।
राष्ट्रिय स्वतन्त्र पार्टी बाट निर्वाचित सांसद आचार्य पछिल्ला केही दिनयता आफ्नो निर्वाचन क्षेत्रमा सक्रिय रूपमा जनसम्पर्क र अनुगमनमा जुटेकी छिन्। स्थानीयस्तरमा बढ्दो कटान जोखिमलाई रोक्न दीर्घकालीन योजना आवश्यक रहेको भन्दै उनले सम्बन्धित निकायसँग समन्वय गरेर समाधानका लागि पहल गर्ने बताएकी छन्।
