विराटनगर । झापा र सुनसरी जिल्लाको विभिन्न स्थानबाट लागू औषध ब्राउन सुगरसहित ७ जनालाई प्रहरीले पक्राउ गरेको छ। झापाको मेचीनगर नगरपालिका–६ स्थितमा लागू औषध नियन्त्रण ब्युरो काँकरभिट्टा र इलाका प्रहरी कार्यालय काँकरभिट्टाको संयुक्त टोलीले चेकजाँच गर्ने क्रममा ३ जनालाई पक्राउ गरेको हो। पक्राउ पर्नेमा मेचीनगर–१३ का रोहन राजबंशी, मेचीनगर–९ का मनिष उप्रेती र मेचीनगर–६ का मिलन कार्की रहेका छन्। उनीहरूको साथबाट ४ ग्राम १५० मिलिग्राम ब्राउन सुगर बरामद गरिएको प्रहरीले जनाएको छ।
त्यसैगरी, सोही क्रममा सर्लाहीको लालबन्दी नगरपालिका–२ का जिम्स खत्रीलाई १ ग्राम ६२० मिलिग्राम र झापाको शिवसताक्षी नगरपालिका–७ का रोहित भण्डारीलाई ७८० मिलिग्राम ब्राउन सुगरसहित पक्राउ गरिएको छ।
यस्तै, इलाका प्रहरी कार्यालय कुमरखोदले झापा गाउँपालिका–२ का समिर प्रसाईलाई २ ग्राम ५६० मिलिग्राम ब्राउन सुगरसहित पक्राउ गरेको छ भने इलाका प्रहरी कार्यालय भण्टाबारी, सुनसरीले सप्तरीको हनुमाननगर कंकालिनी नगरपालिका–९ का श्यामकुमार रजकलाई ७७० मिलिग्राम ब्राउन सुगरसहित नियन्त्रणमा लिएको छ। पक्राउ परेका सबैमाथि थप अनुसन्धान भइरहेको प्रहरीले जनाएको छ।
