सुनसरी मङ्सिर ९ ,
मादक पदार्थ सेवन गरी एम्बुलेन्स चालक कुट्ने सुनसरी दुहवीका पत्रकार चन्दन रौनियार पक्राउ परेका छन् । कुटपिटबाट घाइते भएका इटहरी ५ का गोपाल निरौलाको विराटनगरको न्यूरो अस्पतालमा उपचार भइरहेको छ ।
इलाका प्रहरी कार्यालय दुहवीका प्रहरी निरीक्षक प्रवीण कार्कीले रौनियार पक्राउ परेको पुष्टि गरे । चालकमाथि कुटपिट भएको भएपछि बिहानैदेखि चालक प्रहरी कार्यालयमा भेला भएका थिए। एम्बुलेन्ससहित भेला भएका चालकले दोषीलाई कडा सजाएको माग गरेका छन् ।
पीडितको पक्षबाट एम्बुलेन्स चालक संघ मोरङका सदस्य मनोजकुमार सिवाकोटीले प्रहरी कार्यालयमा उजुरी दर्ता गराएका छन् । 'एम्बुलेन्स चालकमाथि आक्रमण भएको छ । पेशागत सुरक्षामाथि प्रश्न उठेकाले दोषीलाई हदैसम्म कारवाहीका लागि माग गर्दछौं ,' उनले भने।
उजुरी परेपछि रौनियारलाई म्याद थपका लागि सोमबार जिल्ला अदालत इनरुवा लगिएको प्रहरी निरीक्षक कार्कीले जानकारी दिए।-अन्नपुर्ण
