विराटनगर । उप–प्रधान तथा रक्षामन्त्री ईश्वर पोखरेलले सीमा विवादका बारेमा जानकारी दिन भारतसँग नेपाल सरकारले औपचारिक आग्रह गरिसकेको बताउनुभएको छ ।
विराटनगर विमानस्थलमा शुक्रबार संचारकर्मीसँग संक्षिप्त कुरा गर्दै उहाँले अनुरोध पत्र नै पठाएर सरकारले भारतको औपचारिक धारणा माग गरिसकेको जानकारी दिनुभयो ।
‘हाम्रो ‘पोजिसन’ को बारेमा जानकारी दिएर भारत सरकारलाई तत्काल सीमा विवादमा आफ्नो धारणा सार्वजनिक गर्न भनिसकिएको छ,’ उहाँले भन्नुभयो, ‘भारतले आफ्नो नक्सामा पारेको लिम्पियाधुरा, लिपुलेक र कालापानीका विषयमा नेपाल सरकारले कूटनैतिक र राजनैतिक तवरबाट उच्चस्तरीय पहल गरिरहेको छ ।’
अध्यक्ष पुष्पकमल दाहाल ‘प्रचण्ड’ले आब्हान गरेको नेकपा सचिवालय बैठकमा उपस्थित हुन नसकेको कारण बताउँदै नेकपा नेता समेत रहेका पोखरेलले त्यस दिन पार्टी अध्यक्षलाई भनेर नै पूर्व निर्धारित कार्यक्रम अन्तर्गत आफू इलाम गएको बताउनुभयो । भक्तपुर र धरानमा सम्पन्न उप–निर्वाचनको नतिजाका विषयमा चार दिन भित्र जानकारी दिन सम्बन्धित कमिटीलाई निर्देशन दिइसकिएको उहाँले बताउनुभयो ।
