अमेकिाको टेक्सासामा खाद्यान्न स्टोर चलाउँदै आएका नेपाली चन्द्र शिवाकोटीले करिब १० करोड रुपैयाँ (१० लाख अमेरिकी डलर) को चिट्ठा जितेका छन् । उनको स्टोरबाट बिक्री भएको चिट्ठा ‘ज्याकपट’मा परेपछि उनी ‘पावरबल’बाट हकदार बनेका हुन् । चार जनालाई संयुक्त रुपमा परेको ज्याकपटबाट उनको भागमा मात्र १० लाख डलर आएको हो । शिवाकोटी बिहीबार बिहानै स्टोर खोल्न पुग्दा आँगनमा केही मानिस झुम्मिएका थिए । त्यो देखेर सुरुमा उनी स्टोरमा केही भयो कि भन्ने शंकामा परेका थिए । तर एकैछिनमा त्यो अन्यौलमा अपार खुसीमा परिणत भयो । बुधबार खोलिएको उक्त चिट्ठा अमेरिकाकै पाँचौं ठूलो हो । चिट्ठा सञ्चालक टेक्सास लोटरीका अनुसार बिक्रेता स्टोरहरुले सम्बन्धित राज्यमा बिक्री भएका चिट्ठा रकममध्ये १ प्रतिशत पाउने प्रावधान अन्तर्गत शिवाकोटीको भाग्य चम्किएको हो । ४० मिलियन अमेरिकी डलरबाट सुरु हुने उक्त चिट्ठाको रकम बिक्रीसँगै बढ्दै जान्छ । अमेरिकाका ४४ राज्य, वासिङटन डीसी र भर्जिन आइल्याण्डमा समेत चिट्ठा खेलिँदै आएको छ । यो समाचार कान्तिपुरले छापेको छ ।
