प्रबिन दाहाल काठ्मान्डौ
ताप्लेजुङका पहिरो पीडित परिवारका लागि तीन दिनपछि आजबाट आपतकालिन राहत सामग्री पठाउन थालिएको छ । मौसममा सुधार आएसँगै नेपाली सेनाको हेलिकप्टरबाट पहिलो चरणमा औषधिसहितका करीब तीन सय किलो राहत सामग्री पठाईएको जिल्ला बिपद् व्यवस्थापन समितिका संयोजक एवं प्रमुख जिल्ला अधिकारी डमरुप्रसाद निरौलाले जानकारी दिनुभयो । राहत पठाउन हिजो दिनभर प्रयास गरिएपनि मौसमको खराबीका कारण सफल भएको थिएन । आज मौसममा सुधार आएकाले पहिरोमा परी बेपत्ता भएका भएकाको खोजी र राहात तथा उद्धारमा सफलता पाउने विश्वास विपद व्यवस्थापन समितिले गरेको छ । यता उत्तर पश्चिमी ६ वटा गाउँ विकास समितिमा गत बुधवार राती गएको पहिरोमा परी ज्यान गुमाउने मध्ये ३५ जनाको शव फेला परेको छ भने ३१ जना वेपत्ता भएका छन् । मृत्यु हुनेमध्ये २४ जनाको शव आफन्तलाई बुझाइएको प्रहरीले जनाएको छ ।
