बिर्तामोड । झापाको कचनकबल गाउँपालिका–१ घेराबारीमा एक घरमा आगलागी हुँदा एक जनाको मृत्यु भएको छ । सोमबार मध्यरात पौने १ बजे भएको आगलागीमा परी अन्दाजी ६० वर्षीय गोबर्द्धन राजवंशीको मृत्यु भएको हो ।
इलाका प्रहरी कार्यालय घेराबारीका अनुसार घरका अन्य सदस्य भने भागेर बाच्न सफल भएका थिए । भद्रपुर र बिर्तामोड नगरपालिकाको दमकल, स्थानीयवासी र घेराबारी प्रहरी टोलीको सहयोगमा करिब २ बजेतिर आगो नियन्त्रणमा लिइएको प्रहरीले जनाएको छ । आगलागीबाट राजवंशीका ३ वटा घर पूर्ण रुपमा जल्नुका साथै पशु चौपायासमेत जलेर मरेको प्रहरीले जनाएको छ ।
आगलागीबाट भएको क्षतिको एकिन विवरण र आगलागीको कारण नखुलेको जिल्ला प्रहरी कार्यालय झापाका प्रहरी नायव उपरीक्षक राकेश थापाले जानकारी दिए ।
