विराटनगर । लगातार पूर्वी पहाडी क्षेत्रमा भइरहेको वर्षाका कारण सप्तकोशी नदीको जलस्तर बढेपछि नदी तटीय क्षेत्रका नागरिकलाई सचेत रहन आग्रह गरिएको छ । सामान्यतया ५० देखि ७० हजार क्यूसेक प्रतिसेकेण्ड पानीको वहाव रहने कोशीको पछिल्लो समयमा जलस्तर बढ्दैगएको हो ।
शुक्रबार साँझको मापन अनुसार कोशी ब्यारेज भएर १ लाख ५५ हजार ९ सय ७५ क्यूसेक पानी बगिरहेको छ । कोशी ब्यारेज कन्ट्रोल रुमले दिएको जानकारी अनुसार १ लाख ५५ हजार ९ सय ७५ क्यूसेक प्रतिसेकेण्ड बहाब मापन हुँदा ब्यारेजका २४ वटा ढोका खोलिएका छन् ।
कोशीको पछिल्लो मापन अनुसार नदीको बहाबमा निरन्तर वृद्धि भैरहेको छ । सुनसरी जिल्ला प्रशासनले सप्तकोशी नदीको जलस्तरमा घटबढको क्रम जारी रहेको जनाएको छ । तटिय क्षेत्रमा भने कुनै पनि खतरा नरहे पनि सतर्क रहन भने आग्रह गरिएको छ ।
