आज आठौँ राष्ट्रिय सूचना दिवस विभिन्न कार्यक्रम गरी मनाइदैछ । सूचनाको हक सम्बन्धी ऐन कार्यान्वयनमा आएको दिन २०६४ साल भदौ ३ गतेदेखि दिवस मनाउन थालिएको हो । दिवस मनाउन थालिएको ८ वर्ष पुगेपनि नागरिकले अझै पनि आफुसँग सरोकार राख्ने विषयको सूचना पाउन सकिन्छ भन्ने नै थाहा पाएका छैनन् । संविधान अन्तर्गतका निकाय, ऐनद्धारा स्थापित निकाय, सरकारले गठन गरेको निकाय लगायत सरकारले सम्झौता गरेका सार्वजनिक चासोका विषयमा आमनागरिकले सूचना माग्न पाउने छन् । तर सार्वभौमसत्ता, अखण्डता, राष्ट्रिय सुरक्षा, सार्वजनिक शान्ति सुव्यवस्था वा अन्तराष्ट्रिय सम्बन्धमा खलल पुग्ने खालका सूचना भने गोप्य राख्ने अधिकार सम्बन्धित निकायसँग छ । दिवसको अवसरमा प्रधानमन्त्री सुशील कोइराला, संविधानसभाका अध्यक्ष सुवासचन्द्र नेम्वाङ, सरकारका प्रवक्ता डाक्टर मिनेन्द्र रिजाल लगायतले शुभकामना दिनुभएको छ ।
