१८ असोज, काठमाडौं । प्रमुख तीन दलको बैठकमा सरकार गठनबारे ठोस प्रस्ताव नआएपछि एमाले अध्यक्ष केपी शर्मा ओली बहिस्कारको शैलीमा उठेर हिँडेका छन् ।
एमालेले ओलीलाई प्रधानमन्त्रीको उम्मेदवार बनाएको भोलिपल्ट आज बालुवाटारमा तीनदलको बैठक बसेको थियो । लगत्तै प्रधानमन्त्री सुशील कोइरालाले सहमतीय सरकार गठनबारे छलफल गर्न सर्वदलीय बैठक बोलाएकाले तीन दलमा यसबारे ठोस छलफल हुने ओलीको अपेक्षा थियो ।
बैठकको सुरुमा नै ओलीले सरकारबारे ठोस रुपमा कुरा गरौं, मेरो पनि केही भन्नु छ भनेका थिए । तर, त्यसको कुनै सुनुवाइ भएन ।
प्रधानमन्त्री एवं कांग्रेस सभापति सुशील कोइरालाले नयाँ सरकारको विषय प्रवेश वैठकमा त गराए । तर, पार्टीहरुले औपचारिक निर्णय पनि गर्नुर्पयो भन्दै तर्काएपछि ओली उठेर हिँडे ।
कोइरालाको प्रस्तुतिपछि ओलीसहितका एमाले नेताहरु उठेर हिँडेको बालुवाटार स्रोतले बतायो ।
