बिराटनगर असोज १८
भारतीय नाकाबन्दीले औषधिजन्य सामग्रीको आयात गर्न नपाउँदा झापाका दुई अस्पतालको डायलोसिस सेवा बन्द भएको छ । भद्रपुरको ओमसाई पाथीभरा हस्पिटल र विर्तामोडको विर्ता्सिटी हस्पिटलको मिर्गौला उपचारसम्बन्धी डायलोसिस सेवा विगत तीन दिनदेखि बन्द भएको हो । डायलोसिसका लागि चाहिने सामान भारतबाट आयात गर्न नपाउँदा सेवा बन्द गर्न बाध्य हुनपरेको ओमसाई पाथीभरा हस्पिटलका निर्देशक बालकुमार पोखरेलले बताउनुभयो । डायलोसिस सेवा बन्द हुँदा बिरामी मर्कामा परेको र उनीहरूले उपचार अभावमा भाँैतारिरहन परेको विर्ता सिटी हस्पिटलका अध्यक्ष गोपालकुमार बस्नेतले बताउनुभयो । इन्धन आपूर्ति सहज नभए जेनेरेटर चलाउन सम्भव नहुने र त्यसबाट आइसियु र एनआइसियु सेवासमेत प्रभावित हुने अस्पतालले जनाएका छन् ।
