काठमाण्डौं । कानून, न्याय तथा संसदीय मामिला मन्त्री दिलेन्द्र बडूले दलहरुबिच सहमति जुटाएर फाल्गुण ६ गते अमेरिकी सहयोग सम्बन्धी परियोेजना (एमसीसी) टेबुल हुने बताएका छन् ।
बुधबारको प्रतिनिधिसभा बैठकपछि पत्रकारहरुसँग कुरा गर्दै मन्त्री यस्तो बताएका हुन् । उनले एमसीसी टेबुल गर्ने विषयमा दलहरुबिच आवश्यक छलफल भईरहेको बताए । उनले छलफलका लागि थप केही समय चाहिने देखिएपछि दुईदिनको समय प्रदान गरिएको जानकारी दिए । उनले भने, 'छलफलका निम्त्ति दलहरुलाई केही समय चाहिन्छ भनेपछि दुई दिनको समय प्रदान गरेर थप सल्लाह र सहमति अनुसार फागुन ६ गतेमा पेश गर्ने तयारी भएको हो ।'
एमसीसी टेबल गर्ने विषयमा अब पर्खिन नसकिने उनको भनाई छ । मन्त्री बडूले भने, एमसीसीलाई धेरै पर्खिनुहुँदैन । यो संसदमा प्रवेश गर्नुपर्छ, र संसदमै टेबल भएर छलफलमा लैजानुपर्छ । सडकमा भइरहेको बहस टुंग्याउने यो मात्र एक उपाय हो ।
यता नेकपा माओवादीले भने एमसीसी टेबल भए सरकार छोडने चेतावनी दिईसकेको छ । केही दलहरु भने एमसीसीका केही बुँदाहरु संशोधन गरेर मात्र टेबुल गरिनुपर्ने पक्षमा छन् ।
