विराटनगर । मोरङ जिल्ला स्तरीय ‘बी’ डिभिजन क्रिकेट प्रतियोगिताअन्तर्गत बिहीबार भएका दुई खेलमा मिल्स क्रिकेट क्लब विराटनगर र बेलबारी विजयी भएका छन् ।
विराटनगरको वैजनाथ क्रिकेट मैदानमा जारी प्रतियोगिताको पहिलो खेलमा मिल्सले कटहरी राइजिङ क्रिकेट क्लवलाई २ रनले पराजित गरेको छ ।
टस जितेर ब्याटिङ गरेको मिल्सले निर्धारित २० ओभरमा ९ विकेट गुमाई १ सय ११ रन बनाएको थियो । जसमा अभय कुर्मीले २४ रन बनाउँदा पृथ्वी सुब्बाले १८ रन बनाए । कटहरीका नितेश सहनी र राहुल मण्डलले २–२ विकेट लिए ।
१ सय १२ रनको विजयी लक्ष्य पछ्याएको कटहरी निर्धारित ओभरमा ५ विकेट गुमाइ १ सय ९ रनबाट माथि उक्लन सकेन । कटहरीका लागि म्यान अफ द म्याच सुनिल यादवले अविजित ५२ रनको योगदान दिए । बलिङतर्फ मिल्सका आयुस श्रेष्ठ र रुपेश केतवालले २–२ विकेट लिए ।
दोस्रो खेलमा वेलबारी क्रिकेट क्लवले मेरिल्याण्ड क्रिकेट क्लव विराटनगरलाई ७ रनले पराजित गरेको छ । टस जितेर ब्याटिङ गरेको बेलबारीले निर्धारित २० ओभरमा ७ विकेट गुमाई १ सय १३ रन बनाएको थियो । जसमा शंकर तामाङले २५ रन बनाउँदा प्रवीन खडकाले १८ रन बनाए । बलिङतर्फ विराटनगरका विवेक झाले र शशिशेखर झाले पनि समान ३–३ विकेट लिए ।
१ सय १४ रनको विजयी लक्ष्य पछ्याएको विराटनगर पुरा ओभर खेल्दै ९ विकेट गुमाएर एक सय रनमा रोकियो । विराटनगरका लागि कृष्ण देवले सर्वाधिक २९ रनको योगदान दिए । बलिङतर्फ बेलबारीका म्यान अफ द म्याच रविन खडका र निश्चल बुढाथोकीले २–२ विकेट लिए ।
