विराटनगर । कीर्तिपुर नगरपालिकाले आयोजना गरेको दोस्रो राष्ट्रव्यापी अन्तर स्थानीय तह यु–१८ मेयर कप बास्केटबल प्रतियोगितामा सहभागी जनाउन लागेका खेलाडीहरुको विदाई गरिएको छ ।
विराटनगर महानगरपालिका र कोशी प्रदेश बास्केटबल संघले एक कार्यक्रमको आयोजना गरी २ जना प्रशिक्षकसहित १२ जना खेलाडीलाई विदाई गरेको हो ।
प्रतियोगितामा सहभागी हुने खेलाडीहरुलाई विराटनगर महानगरपालिकाको मेयर नागेश कोइराला, कोशी प्रदेश बास्केटबल संघका अध्यक्ष मनिष गुरुङ, सचिव सरोज लम्सालले बिदाई तथा शुभकामना व्यक्त गरे।
महानगरपालिका,नगरपालिका र गाउँपालिकाका १६ वटाको सहभागीता रहेको आयोजकले जनाएको छ।
सहभागी टिमलाई ४ समूहमा विभाजन गरी लिग कम नकआउट आधारमा खेल खेलाइने छ । प्रतियोगिताको विजेताले १ लाख र उपविजेताले ५० हजार नगद पुरस्कार पाउने छन् । ‘मोस्ट भेलुएबल प्लेयर’ लाई १० हजार नगदबाट पुरस्कृत गरिने आयोजकले जनाएको छ।
नेपाल बास्केटबल संघको प्राविधिक सहयोग तथा कीर्तिपुर नगर खेलकुद र कीर्तिपुर बास्केटबल संघको सहकार्यमा हुने प्रतियोगिताका खेलहरु कीर्तिपुरको नयाँ बजारस्थित कभर्डहलमा हुनेछ । गत वर्षको उपाधि म्याग्दीको अन्नपूर्ण गाउँपालिकाले जितेको थियो ।
