काठमाडौं । राष्ट्रिय स्वतन्त्र पार्टीका सांसद मनिष झाले मधेसमा कडाइकासाथ एसईई परीक्षा सञ्चालन नहुँदा मधेश प्रदेश बदनाम भैरहेको उल्लेख गर्दै परीक्षलाई मर्यादित बनाउनुपर्नेमा जोड दिएका छन् ।
सोमबार प्रतिनिधिसभाको बैठकमा २ मिनेट समय माग गरी बोलेका उनले केन्द्रबाट खटाइने प्रहरी प्रशासनका प्रमुखहरु, निरिक्षक र सबै अधिकारीहरुका कमजोरीका कारण परीक्षामा चिट चोर्ने लगायतका अनपेक्षित घटनाहरु बाहिर आएको तर,त्यसको मूल्य सिङगो मधेसले चुकाउन परेको बताए ।
उनले भने,‘अहिले मधेस आफैं एसईई परीक्षा हुँदा चीट चोर्नेहरुको चपेटामा पर्दैछ । यसको दोष मधेसले किन खेप्दैछ ? काठमाडौंमा सुनिन्छ ड्राइभिङ लाइसेन्स छैन् भने मधेस झरौं न पाइहाल्छ भन्ने छ । एसईई पास भएन भने त्यहाँ जाउ भइहाल्छ भन्ने छ । यहीबाट खटाइएको सिडिओ, एसपी निरीक्षक सबै अधिकारीहरुले छुट दिइरहेको छन् । तर त्यसको मूल्य मधेसले तिरिराखेको छ । यसको दोष हामी मधेसी होइन्, केन्द्रबाट खटाइने सबै अधिकारीहरु हुन् ।’
उनले मधेशमा हुँदै गरेको परीक्षालाई गम्भीरतापूर्वक लिई आवश्यक विधि, पद्दती र कडाइका साथ परीक्षा गराउन माग गरे ।
