विराटनगर । तेस्रो संस्करणको मिल्स कप टि-२० क्रिकेट प्रतियोगितामा विराटनगरको वाइआरसिसी क्रिकेट क्लब फाइनलमा पुगेको छ।
विराटनगर जुटमिलको खेलमैदानमा शनिबार भएको पहिलो सेमिफाइनल खेलमा विराटनगरकै एनविएससी क्रिकेट क्लबलाई ११६ रनले हराउँदै वाइआरसिसि फाइनलमा पुगेको हो । जितसँगै वाइआरसीसीले आइतबार हुने दोस्रो सेमिफाइनल खेलमा भारत विहारको कटियार र विराटनगरको होराइजन क्रिकेट क्लबबीच हुने दोस्रो सेमिफाइनको बिजेता टिमसँग उपाधिको लागि खेल्नेछ ।
टस जितेर ब्याटिङ रोजेको वाइआरसिसीले १९.४ ओभरमा सबै विकेट गुमाई २५१ रन बनाएको हो । वाइआरसिसिको जितको लागि इमरन नाजिरले आक्रमक ब्याटिङ गर्दै सतक कटाए । ३८ बलमा उनले १४ छक्का र ३ चौका हिर्काउँदै १०४ रन बनाएका हुन् ।
वाइआरसिसिका देव खनालले अर्धसतक कटाए । २६ बलमा ६ छक्का, ६ चौका हिर्काउँदै ६१ रन बनाए । अभिषेक पल र सन्दिपले समान २३-२३ रन ल्याए ।
एनबीएससीका बलर अनुभवले कसिलो बलिङ गर्दै २.४ ओभरमा २२ रन खर्चेर ५ विकेट लिए । राहुल र राहुल किशोरले समान २-२ विकेट लिए ।
वाइआरसिसिले दिएको २५२ रनको लक्ष्य पछ्याएको एनबीएससीले १२. १ ओभरमा सबै विकेट गुमाई १३५ रन मात्रै बनाउन सक्यो । एनबीएससीका राहुल रिमालले २० बलमा अर्धसतक ५० रन बनाए । उनले ७ छक्का र १ चौका हिर्काए । राहुल चौधरीले २० बलमा ४७ रन बनाउँदा एनबीएससीका अन्य ब्याटरले दोहोरो अंक ल्याउन सकेनन् । वाइआरसीसीका अलराउन्डर खेलाडी अभिषेक पाठकले कसिलो बलिङ गर्दै ४ ओभरमा २४ रन खर्चेर ४ विकेट लिए । नारायण जोशीले ३ ओभरमा २७ रन खर्चेर ३ विकेट लिए । प्लेर अफ द म्याच सर्वाधिक रन ल्याउने वाइआरसीसीका इमरन नाजिर घोषित भए । उनले तीन हजार पाए ।
