काठमाडौं । आज दशौँ अन्तर्राष्ट्रिय योग दिवस नेपालसहित विश्वभर विभिन्न कार्यक्रम र सामुहिक योग गरी मनाइँदैछ ।
नेपालमा यो वर्ष ‘महिला सशक्तीकरणका लागि योग’ भन्ने नारा तय गरिएको छ । संयुक्त राष्ट्रसंघको महासभाबाट सन् २०१४ को डिसेम्बर ११ मा योग दिवस मनाउने प्रस्ताव पारित भएपछि सन् २०१५ को जुन २१ देखि यो दिवस मनाउन थालिएको हो ।
नेपालमा पनि योगाभ्यासलाई जोड दिन सरकारीस्तरबाटै विभिन्न प्रयास हुँदैछन् । यसपटक योग दिवस बनाउन संघीय सरकारले शिक्षा, विज्ञान तथा प्रविधिमन्त्री सुमना श्रेष्ठको अध्यक्षतामा मुल समारोह समिति नै गठन गरेको छ । समितिले भक्तपुरको एसओएस बालग्राममा विशेष कार्यक्रमको आयोजना गरेको छ । सो कार्यक्रममा प्रधानमन्त्री पुष्पकमल दाहालसहित मन्त्री र सरकारका विशिष्ट अधिकारी सहभागी हुँदैछन् ।
कार्यक्रमअघि पेप्सीकोला, गठ्ठाघर, लोकन्थली र मध्यपुरथिमि चोकबाट बालग्रामसम्म प्रभावफेरी हुने शिक्षा मन्त्रालयले जनाएको छ । सरकारले निरन्तर योग गर्ने अभ्यासको बानी विकास गर्न आग्रह गर्दै आएको छ । यसअघि तत्कालीन गृहमन्त्री नारायणकाजी श्रेष्ठले सरकारी कार्यालयमा प्रवेश गरीपछि कर्मचारीहरुलाई पहिले योग र ध्यान गरेरमात्रै सेवा सुचारु गर्न निर्देशन दिएका थिए ।
