विराटनगर । सप्तकोसी नदीको जलसतह उच्च भएपछि तटीय क्षेत्रमा सतर्कता अपनाउन आग्रह गरिएको छ । दिउँसो ३ बजे कोसी ब्यारेजमा तीनलाख ९५ हजार क्युसेक जलसतह मापन गरेको नियन्त्रण मापन केन्द्रले जानकारी दिएको छ । पहाडी क्षेत्रमा भारी वर्षा भएपछि सप्तकोसी नदीमा शनिवार बिहानदेखि पानीको बहाव उच्च हुँदै आएको थियो ।
आइतबार बिहान दिउँसो ३ बजे कोशी ब्यारेज कन्ट्रोल रुमले ३ लाख ९५ हजार क्युसेक पानीको बहाव मापन गरेको छ । अहिले ब्यारेजको ५६ वटा ढोका खोलिएको कन्ट्रोल रुमका कर्मचारी अमित यादवले जानकारी दिएका छन् ।
पानीको बहाव अझै बढ्ने अनुमान गरिएको छ । जल सतह अधिक भएपछि उदयपुर, सुनसरी सप्तरीका नदी कटान हुन सक्ने क्षेत्र र डुबान हुने भागहरूमा उच्च सतर्कता अपनाउन सूचना जारी गरेको छ । स्थानीय प्रशासनले तटीय क्षेत्रका वासिन्दालाई सतर्क रहनका लागि आग्रह गर्दै सूचना जारी गरेको छ ।
