काठमाडौं महानगरपालिका–१६ नयाँबजार खुशिबुबाट काठमाडौं नयाँबजार बस्ने सोलुखुम्बु गुदेलका २७ वर्षीय पासाङ शेर्पालाई स्रोत नखुलेको विभिन्न दरका ५ लाख भारतीय रुपैयाँ सहित आइतबार प्रहरीले पक्राउ गरेको छ ।
सोधपुछको क्रममा उक्त रकम चावहिल बस्ने नुवाकोटकी ३३ वर्षीया विन्दा ढुंगेल र मोरङका ३८ वर्षीय विनय चापागाँईले नेपाली रुपैयाँ सटाई दिनको लागि दिएको बताएपछि दुवैजनालाई प्रहरीले पक्राउ गरेको छ । साथै उनीहरुले उक्त रकम महानगरीय दंगा प्रहरी गण त्रिपुरेश्वरमा कार्यरत दैलेखका प्रहरी जवान २७ वर्षीय मोहन मल्लले आफुहरुलाई दिएको बताएपछि मल्ललाई समेत प्रहरीले पक्राउ गरेको छ ।
यस सम्बन्धमा प्रहरीले थप आवश्यक अनुसन्धान गरिरहेको छ ।
