काठमाडौं । नेकपा माओवादी केन्द्र र नेपाली काँग्रेसका सांसदहरुको संयुक्त प्रस्तावमा प्रधानन्यायाधीश सुशीला कार्कीविरुद्धको महाअभियोग प्रस्तावले संसदमा प्रवेश पाएको छ ।
सहमतिमा महाभियोग प्रस्ताव टेबुल गर्ने विषयमा दलहरुबीच सहमति जुट्न नसक्दा सभामुख घर्तीले प्रतिपक्ष दलको नाराबाजीका बीच संसदमा छलफल गर्ने समय निर्धारण गरेका हुन् ।
महाभियोगको प्रस्तावलाई कार्यसूचीबाट संसदमा पेश गरेपछि प्रतिपक्ष दलले विरोध जनाएका थिए । प्रतिपक्ष दलहरुको नाराबाजीका बीच सभामुख ओनसरी घर्ती मगरले संसदमा टेबुल गरेपछि बैठक अपरान्ह १ बजे सम्मका लागि स्थगित गरिएको छ ।
सदन सुरु हुनुअघि प्रधानमन्त्री पुष्पकमल दाहाल, प्रमुख विपक्षी एमाले लगायत दलका नेताहरुबीच छलफल भएको थियो । बैठकमा एमालेका नेताहरुले महाभियोग प्रस्ताव फिर्ता नलिएको सदनको काम कारबाही चल्न नदिने अडान लिएका थिए ।
एमालेको नाराबाजीका कारण आजको लागि तय भएको संसदनको अन्य कार्यसूची भने हटाइएको सभामुख घर्तीले बताएकी थिइन् ।
