विराटनगर । छठ पर्वलाई लक्षित गर्दै मोरङ प्रहरीले जिल्लाभर तीन तहको सुरक्षा निगरानी गर्ने भएको छ । जसमा सादा पोशाकमा उल्लेख्य संख्यामा प्रहरी परिचालन गरिनेछ । यसैगरी प्रत्येक घाटमा ड्रोनमार्फत निगरानी गर्ने गरी प्रहरीले प्राविधिक तयारी गरेको छ ।
मोरङका प्रहरी उपरीक्षक कबित कटुवालका अनुसार सादा पोशाक, सुरक्षा तैनाथ र सिसी टिभी वा ड्रोन निगरानी हुने गरी तयारी गरिएको हो । त्यस बाहेक प्रहरीले सचेतना समेत अपनाउन आग्रह गर्दै माइकिङ समेत गर्नेछ । जिल्लाभर एकसय ३२ स्थानमा घाटहरु निर्माण हुनेछन् । जहाँ नेपाल प्रहरीसँगै सशस्त्र प्रहरी समेत परिचालन गरिनेछ । प्रहरी उपरीक्षक कटुबालका अनुसार छठ घाट मात्रै नभई त्यो अवसर छोपेर घरमा हुनसक्ने चोरीलाई लक्षित गर्दै प्रहरीले प्रत्येक चोकमा सिसी टिभीबाट निगरानीसँगै पट्रोलिङ्ग समेत गर्ने भएको छ । अवस्था हेरेर जिल्लाभर सुरक्षा संयन्त्र तैनाथ हुन जिल्ला सुरक्षा समितिको बैठकले यस अगाडी नै निर्णय गरिसकेको छ । जसमा नेपाल प्रहरी र सशस्त्र प्रहरीलाई संयुक्त परिचालन गर्ने तयारी गरिएको छ ।
