मोरङ, माघ ९। मोरङको बिराटनगर महानगरपालिका १५ स्थित भन्सार कार्यालयको १ नम्बर ढाटबाट प्रहरीले सोमबार अपरान्ह लागूऔषधसहित एक युवकलाई पक्राउ गरेको छ।
बिशेष सुराकीको आधारमा लागूऔषध नियन्त्रण ब्यूरो बराटनगरबाट खटिएको टोलीले सुनसरी बराह नगरपालिका ७ बस्ने २१ बर्षिय सनम बिश्वकर्मालाई अपरान्ह साढे ४ बजे लागूऔषधसहित पक्राउ गरेको हो।
बिश्वकर्मालाई भारतबाट को ९ प २८९४ नम्बरको मोटरसाईकलमा नेपालतर्फ आउँदै गरेको अबस्थामा नियन्त्रणमा लिई चेकजाँच गर्ने क्रममा मोटरसाईकलको सिटमुनी लुकाई छिपाई ल्याउँदै गरेको लागूऔषध एभिल १ सय एम्पुल, लुपिजेसिक १ सय एम्पुल, डाईजेल्याव १ सय एम्पुल, नाईट्रोसन ट्याब्लेट ४ चक्की, स्पास्मोप्रोक्सिभन ८ चक्की र डाईलेक्स डि.सी. १ बोतल फेला पारी बरामद गरेको हो।
बरामद लागूऔषध सहित बिश्वकर्मालाई इलाका प्रहरी कार्यालय रानीमा राखी थप अनुसन्धान भईरहेको ब्यूरो प्रहरीले जनाएको छ।
